我自從擁有鐳射影碟機之後，家中的錄影機已打落了冷宮，老實告訴你，我起碼有半年沒有動過它了。這幾天北京學潮攪得如火如荼，一百萬人上街遊行，隨時會攪出『大鑊嘢」。我每天都爭取早點回家，盡可能看到兩電視台在晚上十一時後的新聞報導。昨天出門的時候，收到大編輯電話，說約了一位日本建築師橫西良一吃晚飯，聽他講重建香港的計劃，我知道晚上不可能回家看電視新聞，於是便想起錄影，但當我在堆積如山的錄影帶中挑出一盒，預備放進入錄影機時，我面對機上密麻麻的掣，竟然有無從入手之感，我按了幾次掣，都沒有做對。為了趕着出門去見電版黃，我終於放棄，打電話給從來沒有進過學校的母親，請她過來為我調較時間錄影晚間新聞。

老實講，我母親對我的高科技視聽器材比我還熟悉。很多時，我買了新機回來，看說明書看到頭昏腦漲也看不明白，但母親只憑直覺，便完全明白整個操作過程。我最佩服她對微波爐的適應，去年底，我貪新鮮和學時髦，無無謂謂的買了個微波爐回來，我看了幾遍說明書和附送的食譜，也攪不清楚怎樣把一杯凍鮮奶弄熱，但母親一生人從來沒碰過那個「魔術箱」，能立即替我弄出了一份荷包蛋（是荷包蛋，不是煎蛋），同日之內，她還可利用微波爐蒸魚，做芒果布甸，以及燉雪蛤。高科技家庭電器對喜歡思考的人是個惡夢，但對婦孺是偉大的發明。

去到益新，在門口見到鐵馬積奇和神仙周阿倫，我叫他們一起坐到電版黃橫那張檯。電版黃說有個做印刷的台灣佬想在台北攪出版，拿一千萬港幣出來玩兩年，要在香港請人。阿倫好奇地問：「喺台灣辦雜誌，點解要喺香港請人？」

「佢想攪出來啲嘢同本土雜誌唔同，」電版黃解釋：「另外佢想自己啲雜誌有國際視野和眼光，所以覺得喺香港搵人比較適合。」

「我考慮過啦，都係唔想過台北做嘢，」我對電版黃說：「因為我而家喺香港住得好舒服，唔想改變現有嘅生活方式。」

「香港所有讀過洋書嘅人都攪緊移民，你唔通要喺香港過九七咩！？」電版黃原本要把一件燒鴨放進口中，但也要為了說完這句話而放下。

「係呀！香港愈嚟愈刺激，留落嚟睇九七都唔知幾過癮。」我回擊電版黃：「而家北京學生運動攪到咁精采，真係振奮人心。如果呢幾日行得開，我真係想飛去北京跟班學生遊行去新華門。」

「你想去不如代我去嘅，我即刻打電話同老總講，」積奇和阿倫都是在報館做事，常往北京探訪，積奇明顯有點厭倦：「幾個行家今次都被人打傷和拆菲琳，電視台記者也不例外，唔係幾過癮★，聽日去北京採訪五四，我其實好唔想去。」

「未去過北京攞料以為好過癮，去過兩三次之後真係鬼都怕。交通唔方便，通訊又落後，做得趕頭趕命，比喺香港辛苦兩三倍。」阿倫附和說。

「而家正係歷史時刻，喺中南海親眼睇住事情發生，好有成就感喎！」電版黃同我有同樣心情。

「講起中南海就激氣，果度話係人民政府，其實就係摩登嘅封建獨裁官僚衙門，」阿倫去過那裡多次：「中南海喺故宮西面旁邊，有千五畝大，其中水面佔咗差不多一半，裡面嘅建築多數係清朝剩落嚟，都係皇親國戚大官佳嘅，國民黨時代做過總統府，而家就係共產黨大本營，國務院、中央軍委都喺裡面。」

「學生衝新華門，究竟新華門喺中南海邊度？」我問。

「新華門即係正門，實際上就係南門。果啲學生就喺果度嗌『李鵬出嚟』」，積奇對中南海也熟悉：「中南海裡面重有幾棟樓★，有個豐澤園，毛澤東以前多數喺果度開會；有個懷仁堂，袁世凱就喺果度宣誓做總統；有個紫光閣，接見外賓就喺果度；重有個瀛台，光緒俾慈禧囚禁嘅地方，果度風涼水冷，以前皇帝就喺度避暑。」

「我去過故宮，都唔知中南海就縣隔離，點解旅行團啲導遊唔話俾我哋知嘅。」電版黃問。

「旅行團入唔到去，梗係唔話俾啲團友知，費事佢哋詐形，話旅行社冇江湖地位，叫咪仲弊。」積奇所說甚是。

「你估幾時會開放俾大眾參觀？」我自小便很想知道國家領導人究竟怎樣生活，跟我們老百姓有甚麼不同。

「到中國有民主果陣時，中南海就可以開放嘅！」積奇回答。

「不如大家賭一睹，中國幾時先有民主，全民投票選領導人？我買一九九九年。」電版黃賭興大發。

「我買二○○○年。」阿倫說。

「我買二○○一年。」積奇說。

「我買二○○五年，因為到果年，我再唔使供樓，供完晒，所以全國實行民主紀念我得到解放。」我現在每月要供一萬元樓，真是供到氣咳。

「我哋好同情你，也同情十一億同胞，希望二○○五年快啲來到。」他們一齊舉起茶杯向我祝賀。

本來是一頓普通午飯，竟然會是以國家大事為主要內容，那名副其實是一頓政治飯。

#####

[ #1989 #張氏起居注 ]